Ýewropa dilleri we edebiýaty fakulteti

Ýewropa dilleri we edebiýaty fakulteti Türkmenistanyň Prezidentiniň 2019-njy ýylyň 12-nji iýunynda çykaran 1264-nji karary esasynda açyldy. Fakultetde jemi 4 sany kafedra hereket edýär. Olar:

1. Roman-german dilleri kafedrasy

2. Pedagogika we psihologiýa kafedrasy

3. Jemgyýeti öwreniş ylymlar kafedrasy

4. Maglumat tehnologiýalary kafedrasy

Ýewropa dilleri we edebiýaty fakultetinde bakalawr derejesinde taýýarlygyň pedagogika bilimi (nemes we iňlis dilleri), pedagogika bilimi (fransuz we iňlis dilleri), pedagogika bilimi (ispan we iňlis dilleri), pedagogika bilimi (italýan we iňlis dilleri) ugurlary boýunça hünärmenler taýýarlanylýar.

Fakultetde öwredilýän hünär dilleri boýunça dil hepdelikleri yzygiderli geçirilýär. 

Fakultetiň professor-mugallymlary hem-de talyplary ýurdumyzyň ýokary okuw mekdepleriniň talyplarynyň, Aşgabat şäheriniň umumybilim berýän orta mekdepleriniň  ýokary synp okuwçylarynyň arasynda nemes, fransuz dilleri boýunça ders bäsleşikleri, ýurdumyzyň ýokary okuw mekdepleriniň talyplarynyň gatnaşmagynda nemes, fransuz, italýan dillerinde daşary ýurt dillerini okatmagyň usulyýeti boýunça talyplaryň ylmy-amaly maslahatlaryny geçirýärler.   

Mekdebe çenli we mekdep ýaşly çagalaryň daşary ýurt dillerini öwrenmäge höweslerini artdyrmak hem-de dilleri çalt we ýeňil özleşdirmekleri üçin türkmen halk ertekileri nemes, fransuz, ispan, italýan dillerine terjime edilip, yzygiderli çap edilýär we  1-nji, 2-nji synp okuwçylary we mekdebe çenli çagalar bagynyň körpeleri bilen nemes, fransuz, ispan dilleri boýunça ýekebara sapaklar ýazgy edilip, “Ýaşlyk”, “Türkmenistan”, “Arkadag” teleýaýlymlarynda yzygiderli ýaýlyma goýberilýär.

Rus dili we edebiýaty fakulteti

Rus  dili  we  edebiýaty  fakulteti 1990-njy ýylda açyldy. Fakultetde jemi 4 sany kafedra hereket edýär. Olar:

1. Rus dili kafedrasy

2. Rus diliniň nazaryýeti we amalyýeti kafedrasy

3. Rus edebiýaty kafedrasy

4. Dil bilimi kafedrasy

Rus dili we edebiýaty fakultetinde bakalawr derejesinde taýýarlygyň pedagogika bilimi (rus dili we edebiýaty), terjime we terjimeçilik işi (rus dili) ugurlary boýunça hünärmenler taýýarlanylýar.

Fakultetiň professor-mugallymlary hem-de talyplary ýurdumyzyň ýokary okuw mekdepleriniň hem-de daşary ýurtlaryň abraýly ýokary okuw mekdepleriniň talyplarynyň arasynda rus dilinden Halkara onlaýn olimpiadany guramaga hem-de geçirmäge işjeň gatnaşýarlar.  

Türkmen halk ertekilerini rus diline terjime edýärler, 1-nji, 2-nji synp okuwçylary we mekdebe çenli çagalar bagynyň körpeleri bilen  rus dili boýunça ýekebara sapaklary ýazgy edýärler, olar “Ýaşlyk”, “Türkmenistan”, “Arkadag” teleýaýlymlarynda yzygiderli ýaýlyma goýberilýär.   

Rus dili we edebiýaty fakultetinde talyplara rus dili hünär dili hökmünde kämil derejede öwredilýär. Fakultetde her okuw ýylynda rus dili hepdeligi geçirilip, talyplar hepdäniň dowamynda çykyş edýärler we rus medeniýetini has içgin öwrenýärler.

Gündogar dilleri we edebiýaty fakulteti

Gündogar dilleri  we  edebiýaty  fakulteti 1999-njy ýylda açyldy. Fakultetde jemi 4 sany kafedra hereket edýär. Olar:

1. Ýakyn gündogar dilleri kafedrasy

2. Uzak gündogar dilleri kafedrasy

3. Türkmen dili kafedrasy

4. Türkmen edebiýaty kafedrasy

Gündogar dilleri we edebiýaty fakultetinde bakalawr derejesinde taýýarlygyň pedagogika bilimi (türkmen dili we edebiýaty), pedagogika bilimi (arap dili, türkmen dili we edebiýaty), pedagogika bilimi (pars dili, türkmen dili we edebiýaty), pedagogika bilimi (türk dili, türkmen dili we edebiýaty), pedagogika bilimi (hindi dili, türkmen dili we edebiýaty), pedagogika bilimi (hytaý dili, türkmen dili we edebiýaty), pedagogika bilimi (ýapon dili, türkmen dili we edebiýaty), pedagogika bilimi (koreý dili, türkmen dili we edebiýaty) ugurlary boýunça hünärmenler taýýarlanylýar.

Fakultetde okadylýan hünär dilleri bilen baglanyşykly dil hepdelikleri yzygiderli geçirilýär. Dil hepdeliklerinde talyplar öz hünär diliniň medeniýeti boýunça bezeg işlerini, medeniýet burçlaryny döredip, şol milletiň milli tagamlarydyr lybaslary we saz gurallary bilen tanyşdyrýarlar. Dil hepdeligi talyp ýaşlaryň ýerine ýetirmeginde gyzykly çykyşlar, degişmeler we aýdym-sazlar bilen dabaraly ýagdaýda jemlenýär.

Fakultetde okadylýan hünär dillerinde “Suhangöýlik” bäsleşikleri, döredijilik duşuşyklary, zehin bäsleşikleri, ders bäsleşikleri geçirilýär. Oňa Aşgabat şäherinde ýerleşýän ýokary okuw mekdepleriniň talyplary gatnaşdyrylýar. Bäsleşik iki tapgyrda onlaýn hem-de ýüzbe-ýüz ýagdaýda geçirilýär.

Fakultetiň professor-mugallymlary hem-de talyplary tarapyndan mekdebe çenli we mekdep ýaşly çagalaryň daşary ýurt dillerini öwrenmäge höweslerini artdyrmak hem-de dilleri çalt we ýeňil özleşdirmekleri üçin türkmen halk ertekileri arap, pars, türk, hindi, hytaý, ýapon, koreý dillerine terjime edilip, yzygiderli çap edilýär we 1-nji, 2-nji synp okuwçylary we mekdebe çenli çagalar bagynyň körpeleri bilen koreý, ýapon, hindi dilleri boýunça ýekebara sapaklar ýazgy edilip, “Ýaşlyk”, “Türkmenistan”, “Arkadag” teleýaýlymlarynda yzygiderli ýaýlyma goýberilýar.

Iňlis dili we edebiýaty fakulteti

Iňlis  dili  we  edebiýaty  fakulteti  2019-njy   ýylda  açyldy. Fakultetde  jemi 5 sany  kafedra hereket  edýär.  Olar:

1. Iňlis  filologiýasy  kafedrasy

2. Iňlis  dili  kafedrasy

3. Terjimäniň  nazaryýeti  we  amalyýeti  kafedrasy

4. Daşary  ýurt  edebiýaty  kafedrasy

5. Bedenterbiýe  kafedrasy

Iňlis dili we edebiýaty fakultetinde bakalawr derejesinde taýýarlygyň pedagogika bilimi (iňlis dili), terjime we terjimeçilik işi (iňlis dili) ugurlary boýunça hünärmenler taýýarlanylýar.

Pedagogika bilimi (iňlis dili) hünärinde okaýan talyplara ikinji daşary ýurt dili hökmünde nemes we fransuz dilleri öwredilýär.

Fakultetiň professor-mugallymlary hem-de talyplary institutda her ýyl “The  International Internet Olympiad in English Among the Students of Linguistic and non-linguistic specialties of higher educational institutions of Turkmenistan and abroad” ady bilen talyplaryň arasynda iňlis dilinden geçirilýän Halkara onlaýn olimpiadasyny guramaga hem-de geçirmäge işjeň gatnaşýar.    

Mekdebe çenli we mekdep ýaşly çagalaryň daşary ýurt dillerini öwrenmäge höweslerini artdyrmak hem-de dilleri çalt we ýeňil özleşdirmekleri üçin türkmen halk ertekileri iňlis diline terjime etmäge, redaktirlemäge, şeýle-de 1-nji, 2-nji synp okuwçylary we mekdebe çenli çagalar bagynyň körpeleri bilen iňlis dili boýunça ýekebara sapaklary ýazgy etmäge gatnaşýar. Ol sapaklar “Ýaşlyk”, “Türkmenistan”, “Arkadag” teleýaýlymlarynda yzygiderli ýaýlyma goýberilýär.