Ýurdumyzyň orta hünär we ýokary okuw mekdepleriniň talyplarynyň arasynda “Geomaglumat ulgamlary we çözgütleri” hakaton bäsleşigi

Türkmenistanyň Prezidentiniň ýurdumyzyň bilim ulgamyny döwrebaplaşdyrmakda, ýokary ylmy mümkinçiligi bolan giň gözýetimli, maksada okgunly, innowasion tehnologiýalary dolandyrmaga ukyply, ýokary hünär taýýarlykly ýaşlary terbiýeläp ýetişdirmekde bilim işgärleriniň öňünde goýan baş wezipelerini oňyn çözmek, Türkmenistanda sanly bilim ulgamyny ösdürmegiň Konsepsiýasyny durmuşa geçirmegiň Meýilnamasyny ýerine ýetirmek, bilim ulgamynda täzeçillikleri ornaşdyrmak maksady bilen,  2024-nji ýylyň 18-19-njy noýabrynda S.A.Nyýazow adyndaky Türkmen oba hojalyk uniwersitetinde ýurdumyzyň orta hünär we ýokary okuw mekdepleriniň talyplarynyň arasynda “Geomaglumat ulgamlary we çözgütleri” hakaton bäsleşigi geçirildi.

Bu bäsleşik talyplarda kesgitli meseläni çözmekde täze ideýalaryň, pikirleriň döremegine itergi berýär, olaryň döredijilik ukybyny ýokarlandyrmaga, talyplaryň taslama işlerini ýerine ýetirmekde dürli maglumatlary birikdirip bilmek başarnyklaryny ösdürmäge, programma üpjünçilikleriniň işjeňligini ýokarlandyrmagyň ýollaryny kesgitlemäge, talyplaryň ukyp başarnyklaryny açyp görkezmäge, talyplara giňişligi we logistikany dolandyrmada, sanlylaşdyrmada amaly meseleleri çözmekde geomaglumat ulgamlary we geomaglumat serişdeleri peýdalanmaklygy öwretmäge, talyplaryň geomaglumat ulgamlaryň, duýgur elementleriň kömegi bilen ýer şarynyň üstüni uzak aralykdan öwrenmek tehnologiýalaryny peýdalanmak endiklerini kemala getirmäge hem-de kämilleşdirmäge, talyplara territoriýalaýyn meseleleri çözmekde döredijilikli pikirlenmek we toparlaýyn işlemek tejribelerini ösdürmäge ýardam edýär.

S.A.Nyýazow adyndaky Türkmen oba hojalyk uniwersitetiniň guramagynda geçirilen ýurdumyzyň orta hünär we ýokary okuw mekdepleriniň talyplarynyň arasynda “Geomaglumat ulgamlary we çözgütleri” hakaton bäsleşigine Döwletmämmet Azady adyndaky Türkmen milli dünýä dilleri institutynyň talyplar topary hem işjeň gatnaşdy. Hakaton bäsleşiginiň dowamynda talyplarymyz öz ukyp-başarnyklaryny görkezdiler.

Bäsleşigiň netijesi boýunça eminler agzasy tarapyndan ýeňijiler kesgitlenip, Döwletmämmet Azady adyndaky Türkmen milli dünýä dilleri institutynyň talyplar topary baş baýraga mynasyp boldy.

Bäsleşigiň ýeňijileri we oňa gatnaşyjylar S.A.Nyýazow adyndaky Türkmen oba hojalyk uniwersitetiniň diplomlary we gymmat bahaly sowgatlary bilen sylaglandy.

Bäsleşigiň jemleýji dabarasyna gatnaşyjylar döwletimiziň berkararlygyny, halkymyzyň bagtyýarlygyny ähli zatdan ileri tutýan Gahryman Arkadagymyza, beýik özgertmeleri mynasyp dowam edýän hormatly Prezidentimize alkyş sözlerini beýan edip, Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak bolmagyny, il-ýurt bähbitli, dünýä ähmiýetli işleriniň hemişe rowaçlyklara beslenmegini tüýs ýürekden arzuw etdiler.