Dilleri öwretmegiň döwrebap meselelerine bagyşlanan maslahat
962024-nji ýylyň 5-nji sentýabrynda Döwletmämmet Azady adyndaky Türkmen milli dünýä dilleri institutynda Türkmenistanyň hünär bilimi edaralarynda okaýanlaryň daşary ýurt dillerini özleşdiriş derejesini bahalandyrmagyň netijeleri boýunça “Daşary ýurt dillerini okatmagy mundan beýläk-de kämilleşdirmegiň esasy ugurlary” atly usulyýet maslahaty geçirildi. Oňa ýurdumyzyň ýokary we orta hünär okuw mekdepleriniň mugallymlary gatnaşdylar. Usulyýet maslahatynda “Türkmenistanda daşary ýurt dillerini okatmagy kämilleşdirmegiň Konsepsiýasynda” bilim ulgamyny döwrüň talaplaryna laýyk ösdürmek babatda kesgitlenen wezipeler, daşary ýurt dillerini okatmagyň usulyýetini kämilleşdirmek ugrunda gazanylan netijeler we öňde durýan wezipeler, ýurdumyzyň bilim ulgamyndaky halkara hyzmatdaşlygyň ýeten sepgitleri we täze gözýetimleri, bilimiň sanly gurşawyny emele getirmek we innowasion bilim tehnologiýalaryny ornaşdyrmak ugrunda ýerine ýetirilmeli işler, Türkmenistanda sanly bilim ulgamyny ösdürmegiň, daşary ýurt dillerini okatmagy kämilleşdirmegiň konsepsiýalaryna laýyklykda okatmagyň usullary, Türkmenistanyň hünär bilimi edaralarynda okaýanlaryň daşary ýurt dillerini özleşdiriş derejesini bahalandyrmak, gazanylan netijeler we öňde durýan wezipeler, dürli ugurly ýokary okuw mekdeplerinde daşary ýurt dillerini okatmagyň, hünär sözleýşini öwretmegiň ligwodidaktik meseleleri we innowasion usullary hakynda çykyşlar diňlendi.
Ylmy-usuly çykyşlarda ýurdumyzyň ynsanperwer, mugallymçylyk, tehniki, lukmançylyk we agrar ugurly ýörite orta we ýokary okuw mekdeplerinde daşary ýurt dillerini, hususan-da iňlis we rus dillerini netijeli öwretmegiň usuly aýratynlyklary, döwrebap usullary we innowasion tehnologiýalary baradaky meselelere aýratyn üns berildi. Çykyşlarda bellenilişi ýaly, Berkarar döwletiň täze eýýamynyň Galkynyşy döwründe türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň başlangyçlary, Hormatly Prezidentimiz Serdar Berdimuhamedowyň milli bilim ulgamyny ösdürmek ugrunda alyp barýan tutumly işleri, durmuşa geçirýän düýpli maksatnamalary ösüp gelýän ýaş nesle döwrebap bilim-terbiýe bermegiň binýadyna öwrüldi.
Maslahat bilen ugurdaş türkmen halkynyň Milli Lideri Gahryman Arkadagymyzyň, Hormatly Prezidentimiz Arkadagly Gahryman Serdarymyzyň kitaplarynyň, Magtymguly Pyragynyň edebi mirasyna degişli ýygyndylaryň, goşgular toplumynyň, institutyň professor-mugallymlarynyň okuw kitaplarynyň, gollanmalarynyň, monografiýalaryň hem-de ýurdumyzyň durmuş-ykdysady ösüşine bagyşlanan taslamalaryň, talyp ýaşlaryň bilim, ylmy-döredijilik, taslama bäsleşiklerinde, olimpiadalarynda we sportda gazanan üstünlikleriniň we milli amaly-haşam sungatynyň gymmatlyklarynyň sergisi guraldy.
Maslahatyň ahyrynda oňa gatnaşyjylar tarapyndan Türkmenistan Watanymyzda Berkarar döwletiň täze eýýamynyň Galkynyşy döwründe alyp barýan we durmuşa ornaşdyrýan ylmy, bilimi täze belentliklere ýetirmekdäki maksatnamalaýyn işleri üçin türkmen halkynyň Milli Lideri Gahryman Arkadagymyza we Hormatly Prezidentimiz Arkadagly Gahryman Serdarymyza alkyş we hoşallyk sözleri aýdyldy.
