Türkmenistanyň ýaşlarynyň wekilleri «Jastar Generation – 2024» Halkara ýaşlar lagerine gatnaşdylar
Türkmen wekiliýeti 2024-nji ýylyň 12-14-nji sentýabrynda Gazagystan Respublikasynyň Almata şäherinde geçirilen «Jastar Generation – 2024» Halkara ýaşlar lagerine gatnaşdy. Lageriň işi ajaýyp “Arman Dala” sagaldyş-dynç alyş merkeziniň binýadynda geçirildi. Çäre Gazagystanyň halkynyň Assambleýasynyň –«Assambleýa žastary» respublikan jemgyýetçilik guramasynyň Ýaşlar şahasynyň guramagynda geçirilip, ol Merkezi Aziýa döwletleriniň ýaşlar düzüminiň wekillerini, ýaş liderleri we hünärmenleri bir ýerde jemledi. Bu halkara çäräniň maksady tejribe alyşmakdan, bilim ulgamyndaky häzirkizaman çemeleşmeleri öňe sürmegiň we halkara hyzmatdaşlygy ösdürmegiň meselelerini ara alyp maslahatlaşmakdan ybarat boldy.
Lageriň çäklerinde Döwletmämmet Azady adyndaky Türkmen milli dünýä dilleri institutynyň mugallymy Maksat Bugraýew bilim ulgamyndaky innowasiýalara, dil ygtybarlylygyny ösdürmäge we medeniýetara kommunikasiýa bagyşlanan çekişmelere işjeň gatnaşdy. Çäreleriň maksatnamasynda sanly tehnologiýalary bilim işine ornaşdyrmak we daşary ýurt dillerini okatmagy kämilleşdirmek meselelerine aýratyn üns berildi.
Çäreleriň arasynda ussatlyk sapaklary, taslamalaýyn menejment, medeniýetara kommunikasiýalar, emosional intellekt, media giňişliginde oňyn netijeli başlangyçlary ilerletmek we beýleki ugurlar boýunça türgenleşikler geçirildi. Bu ugurlaryň kämilleşdirilmegi geljegi uly bolan ýaş hünärmenleriň derwaýys başlangyçlaryny üstünlikli durmuşa geçirmegine ýardam berer.
Kiçi toparlar formaty görnüşinde guralan temalaýyn-interaktiw çäreler we ussatlyk sapaklary maksatnamanyň möhüm bölegi boldy. Çärä gatnaşyjylaryň toparlara bölünmegi türkmen hünärmenlerine hereketleriň utgaşdyrylmagynda işiň netijeliliginiň ýokarlandyrylyşyny yzarlamaga, öz kommunikatiw endiklerini ösdürmäge, höwesliligini ýokarlandyrmaga, taslamalara gatnaşyjylaryň hersiniň wezipelerini anyklaşdyrmaga we özleriniň güýçli taraplaryny ýüze çykarmaga, şeýle hem liderlik häsiýetler ulgamynda ygtybarlyklaryny giňeltmäge mümkinçilik berdi.
«Jastar Generation – 2024» halkara ýaşlar lageri dürli ýurtlaryň bilim edaralarynyň arasynda täze gatnaşyklary açmak we hyzmatdaşlygy ýola goýmak üçin möhüm platforma boldy. Şunuň ýaly ähmiýetli halkara taslama gatnaşmak ýurdumyzyň ýaş hünärmenleriniň hünär babatda gözýetimini giňeltmäge mümkinçilik bermek bilen çäklenmän, eýsem iň gowy amaly tejribeleriň we innowasion çözgütleriň ulanylmagynda Türkmenistanda okatmagyň hilini täze derejä çykarmaga ýol açýar.
Mundan başga-da türkmen wekilleri geçirilen çärelerde we duşuşyklarda sebitiň ýurtlarynyň ýaşlar syýasaty ulgamynda amala aşyrýan üstünlikli taslamalarynyň, maksatnamalarynyň we başlangyçlarynyň netijesinde toplanan tejribäni paýlaşýandyklaryny aýratyn nygtap geçdiler. Muňa mysal hökmünde geçen ýyl biziň ýurdumyzyň döwlet ähmiýetli Arkadag şäherinde geçirilen “Dialog – parahatçylygyň kepili” atly Halkara ýaşlar forumynyň çäklerinde gol çekilen Merkezi Aziýa döwletleriniň ýaşlar dialogyny döretmek baradaky Ähtnamany agzap bolar. Şeýle hem ýaşlaryň iş salyşmaly bolýan kyn meseleleriniň bilelikdäki seljermesi geçirilýär, olar boýunça netijeli çözgütleriň işjeň gözlegleri alnyp barylýar, ýaşlar syýasaty ulgamynda işleýän ýaş hünärmenler üçin okuw maksatnamalary işlenilip taýýarlanylýar we durmuşa geçirilýär. Şu jähetden türkmen halkynyň Milli Lideri Gahryman Arkadagymyzyň we hormatly Prezidentimiz Serdar Berdimuhamedowyň ýurdumyzyň ýaşlar hereketiniň ösdürilmegine, hususan-da, degişli strategik başlangyçlaryň kabul edilmeginiň çäklerinde berýän bimöçber goldawlarynyň ähmiýeti buýsanç bilen bellenip geçildi. Dürli ýurtlardan gelen gatnaşyjylara bu ugurda özara ylalaşykly işiň ýola goýulmagynyň Berkarar döwletiň täze eýýamynyň Galkynyşy döwründe türkmen ýaşlarynyň giň mümkinçilikleriniň üstünlikli durmuşa geçirilmegine ýardam edýändigi barada giňişleýin maglumat berildi.
Döwletmämmet Azady adyndaky Türkmen milli dünýä dilleri institutynyň mugallymynyň şunuň ýaly halkara başlangyçlara, çärelere işjeň gatnaşmagy ýurdumyzyň bilim ulgamynda häzirki zaman çemeleşmelerinden, bu ugurda işleri yzygiderli kämilleşdirmekden ugur alynýandygyna şaýatlyk edýär, şeýle hem Türkmenistanyň bilim ulgamynda halkara hyzmatdaşlygyny berkitmäge, ýurdumyzyň bilim pudagynyň abraýyny ýokarlandyrmaga ýardam edýär.